Formulariu Rejistrasaun Kompetisaun Game Arena of Valor (AoV)

Ola belun gamers sira! Mai partisipa iha kompetisaun game Arena of Valor (AoV) (1 VS 1) mak aprezentadu husi TELKOMCEL serbisu hamutuk ho Females Love Information Technology (FEELIT) no hetan apoiu husi Fundasaun Dezenvolvimento Software Livre (FDSL).

Informasaun loron no data kompetisaun Arena of Valor bele hare'e iha kraik ne'e:

• BRIEFING sei hala'o iha edifisiu FDSL, Loron Sabadu, 17 Fevereiru 2018, Oras tuku 15:00 OTL to'o tuku 17:00 OTL.


• Etapa ELIMINASAUN iha edifisiu FDSL, Loron Domingo, 18 Fevereiru 2018, Oras tuku 09:00 OTL to'o tuku 17:00 OTL.


• Etapa SEMI-FINAL & FINAL iha Timor Plaza, Loron Sabadu, 24 Fevereiru 2018, Oras tuku 15:00 OTL to'o tuku 18:00 OTL.

Rejistrasaun kompetisaun game Arena of Valor gratuita. Formulariu rejistrasaun, kriteria no regulamentu kompetisaun  bele download iha link kraik ne'e.

DOWNLOAD

Kontinua Le'e

Rede Kreatividade Fotografu (REKREATIF) Organiza Eventu “Woman Behind The Camera”

Loron 17-18 Agustu 2017, Rede Kreativu Fotografu (REKREATIF) organiza eventu "Woman Behind The Camera" iha Timor-Plaza.

Partisipantes "Women Behind The Camera"

Koordenador REKREATIF Gil Barros De Jesus akresenta katak "Ami hili tema husi eventu ne’e mak Woman Behind The Camera, tamba durante ne’e ita hare’e ba situasaun ne’ebe’e real ne’e maioria mane deit sai nudar profisional iha area fotografer nian. Ho razaun ida ne’e mak ami hili tema ba eventu ne’e Woman Behind The Camera liu husi eventu ne’e bele promove feto sira iha area fotografer nian tamba fotografer ne’e laos ba mane deit maibe feto mos iha direitu atu hola parte iha area refere no ami hein katak liu husi eventu ida, partisipantes sir abele kontinua promove sira nia talenta iha area fotografer ninian".

Noviani Hi Manafè nudar xefe komisaun organizadora hatutan katak "objetivu husi eventu ida ne’e atu bolu maluk feto sira ne’ebe iha talenta iha area fotografer nian hodi mai tuir eventu ne’e tamba liu husi eventu ne’e bele promove sira nia talentu no iha eventu ida ne’e ami hala’o durante loron rua, loron dahuluk 17 Agustu 2017 konaba workshop no loron daruak 18 Agustu 2017 konaba kompetisaun".

Orador I: Ann Turner

Iha loron dahuluk workshop "Women Behind The Camera" 17 Agustu 2017, Oradora I ho naran Ann Turner aprezenta liu kona ba feto nia papel iha area fotografu ne’ebe iha parezentasaun refere fahe ba iha parte rua, parte dahuluk konaba "Fotografia Báziku" no parte daruak konaba "Feto Fotografu Ne’ebe Famozu Iha Istória" tamba iha mos feto ne’ebe profisional iha tinan atus ida resin ona, atu hatudu ba feto foinsa’e Timor oan sira katak iha ona feto ne’ebe profisional iha area fotografu tan ne’e labele hanoin dehan ida ne’e buat foun.

"Objetivu importante liu mak atu fo motivasaun ba feto foinsa’e Timor oan sira, atu enkoraja sira atu hahu atividade fotografia, karik iha foto dahuluk mak ladun diak maibe iha future oin mai sira sei hetan matenek ho esperiensia. Entaun kuandu sira iha inspirasaun, disiplina, profesionalismu, entaun sira mos bele tama ba iha profisaun nudar fotografu ne’ebe professional”. Hateten Ann Turner.

Ann Turner mos hakarak hato’o mensazen ba feto foin sa’e Timor oan sira katak "Ba oin sira ne’ebe mak hakarak aprende klean liu tan, labele hanoin katak ekipamentus ne’e karun liu, maibe importante liu mak sira nia matan hare foto molok hasai foto no sira nia fuan ne’ebe iha antusiasmu konaba buat ida, ezemplu: sira gosta hasai foto ba familia, hahan, paizazen no seluk tan laiha buat ida tamba sira tenki hetan topiku atu nune’e bele sai hanesan sira nia inspirasaun no liu husi ne’e sira bele esforsu a’an serbisu tuir disiplina no hetan esperiensia, entaun sira bele sai professional iha area fotografu nian".

Orador II: Bernardino Soares

Iha workshop refere orador II ho naran Bernardino Soares aprezenta konaba "Tekniku Báziku Fotografu" ne’ebe halai liu kona ba tekniku hasai fotografia.

"Ha’u kontenti no agradese ba REKREATIF tamba organiza ona eventu ida ne’e no konvida ona ha’u atu mai fahe ideia no ha’u hein katak REKREATIF ba oin sei organiza nafatin maibe ho tema ne’ebe lahanesan. Materia ne’ebe ha’u fo ne’e hanesan xave deit tamba tempu maibe ba oin sira mak sei buka rasik hodi haklean liu tan no materia nee mos sufisiente atu bele prepara sira ba loron aban hodi tuir kompetisaun, maibe atu dehan liu husi ida ne’e sira bele sai professional tebes kedas ne’e. seidauk tamba atu sai professional presija tebes tempu barak hodi aprende, to’o agora ha’u nia aan rasik mos sei presija aprende tan" Hateten Bernadino Soares.

Bernadino Soares mos hakarak hato’o lia-menon katak "Ba se deit ne’ebe aprende fotografia, dahuluk tenki senti livre no tenta enjoy saida mak ita halo tamba kreatividade ne’e mai wainhira ita senti livre. Ne’e duni labele hasai foto par ema dehan ita mos makaas maibe ita hasai foto ba ema hotu-hotu. Ha’u nia prinsip mak ne’e, ha’u hasai foto ba ema hotu-hotu, tamba nia importante atu ema hotu-hotu komprende liu husi foto ne’e bele fo mensazen ba ema hotu. Laos kona ba teknika, teknika ne’e somente falun deit maibe too final ne’e konteudu mak koalia tan ne’e mensazen ne’e mak importante liu".

Iha loron daruak 20 Agostu 2017, iha kompetisaun fotografia ho topiku "Ita Nia Timor-Plaza" hetan partisipante nain-tolu ne’ebe sai nudar manan nain ba kompetisaun refere. Partisipante ne’ebe hetan Primeira Lugar mak ho naran Stefania Ovita do Carmo ne’ebe iha nia fotografia fo mensazen katak "Bin ne’e servisu iha Timor-Plaza parte faan telefoni merek (OPPO)".

Primeira Lugar: Estefania Ovita do Carmo

Stefania Ovita Do Carmo akresenta katak "Ha’u senti kontenti bele partisipa iha eventu Women Behind The Camera no agradese tebes ha’u bele sai manan nain ne’ebe hetan Primeira lugar. Tamba ida ne’e sai hanesan etapa dahuluk no esperiensia dahuluk iha mundu fotografia ida ne’ebe hala’o durante loron rua iha eventu ne’e, ba oin ha’u hakarak aprende klean liu tan atu nune’e bele hasa’e nia kapasidade iha mundu fotografia".

Partisipante ne’ebe hetan Segundu Lugar mak ho naran Estrelita P. W. Brito ne’ebe iha nia foto fo mensazen katak "Ha’u nia servisu la ses husi Hena".

Segundu Lugar: Estrelita P. W. Brito

Partisipante ne’ebe hetan III lugar mak ho naran Iriana Domina A. Soares ne’ebe iha nia foto fo mensazen katak "Ha’u nia hamnasa mak halakon ha’u nia kolen".

Rede Kreativu Fotografu (REKREATIF) hakarak hato’o obrigado wain ba Timor-Plaza ne’ebe sai ona sponsor ba eventu refere no ba suporta tomak husi Fundasaun Dezenvolvimentu Software Livre (FDSL), Females Love Information Technology (FEELIT), Likisa Host no TELKOMCEL.

Kontinua Le'e

Dili Wikipedia Contributor (DWC) Organiza Eventu “Wikipedia Zero”

Dili Wikipedia Contributor (DWC) organiza eventu "Wikipedia Zero" iha Timor-Plaza iha loron 17-18 Agustu 2017.

Koordenador Dili Wikipedia Contributor Binsar de Jesus akresenta katak, "Iha tinan 2009 mak lansa wikipedia iha Timor-Leste no ami iha estudante nain ha’at nebe kontribui iha Wikipedia Tetum nebe to’o agora artigu nebe iha mak 1401 nebe publish ona no ami hein katak liu husi eventu ida ne’e bele hetan fini foun ba hakerek nain ba Wikipedia Tetum".

Binsar de Jesus mos nudar xefe komisaun organizadora hatutan katak, "iha loron dahuluk 17 no daruak 18 Agustu 2017, DWC organiza mini seminar no kompetisaun ho nia topiku kona ba Wikipedia Zero ho nia objetivu atu promove eskritor foin sa’e sira".

Iha loron dahuluk 17 Agustu 2017 iha mini seminar refere Binsar de Jesus hanesan mos orador I aprezenta konaba "Wikipedia Jeral & Wikipedia Zero". Binsar de Jesus hato'o liafuan kona-ba Wikipedia, "Wiki katak lalais no pedia katak hakerek tuir sistematiku entaun nia konkluzaun katak Wikipedia signifika hakerek ho lalais no iha dalan nebe sistematiku".

Orador I: Binsar de Jesus

"Wikipedia ensklopedia livre nebe fahe ba parte oin-oin mak hanesan contributor, translator no upload media no kada sira nee ida iha nia instrusaun rasik. Wikipedia hanesan website ida nebe fo livre ba ema hotu-hotu atu hakerek no edit" hatutan Binsar De Jesus.

Iha mini seminar refere iha orador II ho naran Rofino Leandro Pereira aprezenta kona ba "Contributor" ho nia objetivu hanorin ita oinsa mak bele hakerek artigu ida iha Wikipedia nia laran.

Orador II: Rofino Leandro Pereira

"iha wikipedia nia laran artigu ne’e nudar fatin ida atu ema hakerek informasaun ou dados nebe atu fo sai iha Wikipedia nia laran, liu husi artigu ema bele le’e no komprende saida mak ita hakerek" hateten Rofino Leandro Pereira.

Iha mini seminar refere iha orador III ho naran Ruben Silva Gusmão aprezenta kona ba "Oinsa Halo Translasaun Iha Wikipedia Tetum" ho nia objetivu liu husi translasaun nee bele aumenta hakerek nia kapasidade iha area linguazem nia liu-liu entre lian Tetum no lian seluk.

Orador III: Ruben Silva Gusmão

"Atu halo translasaun iha Wikipedia tetum, antes nee ita tenki iha akaun hodi registu liu tiha ne’e iha menu kontribuisaun ita bele hili iha oin tolu mak hanesan : kontribuisaun artigu, translasaun no upload media, ita atu halo translasaun tan nee ita hili translasaun hodi bele tama ba iha janela translasaun Wikipedia Tetum" hateten Ruben Silva Gusmão.

Iha mini seminar refere iha orador IV ho naran Silvestre Pires Castro hato'o aprezentasaun kona-ba "Oinsa Upload Imajen Iha Wikipedia" ho nia objetivu hakerek deit artigu ladun diak tenki upload ho imajen ruma hodi bele hatudu ba ema imajen nebe iha relasaun ho artigu refere.

Orador IV: Silvestre Pires Castro

"Ita hatene ona katak iha Wikipedia ne’e livre ba ema atu edit, tan ne’e ema bele edit imajen nebe ita hatama maske husi fontes imajen ne’e la’os sira nia. Maibe ida ne’e hahalok nebe ladiak, ba hakerek nain sira iha Wikipedia hakarak upload media ne’e diak liu mai husi ita nia kreativu ou fontes nebe mai husi ita rasik. Karik ita kopia husi fontes ema seluk nia entaun ita mos tenki hakerek fontes husi imajen refere mai husi (naran ema nain nee nian)". Silvestre Pires Castro hateten.

Iha loron daruak 18 Agustu 2017, DWC mos realiza kompetisaun ho topiku "Wikipedia Zero" hetan partisipante nain-tolu nebe sai nudar manan nain ba kompetisaun refere. Partisipante nebe hetan I lugar maka ho naran Marfilho Fidel Alvares, hakerek nain ne’e hakerek iha artigu rua nebe ho nia topiku ketak-ketak. artigu dahuluk ho nia titulo, "Ili Kere-Kere" no artigu daruak ho nia titulo "Katólika".

Primeiru Lugar: Marfilho Fidel Alvares

Partisipante nebe hetan II lugar maka ho naran Adelson Raimundo Reis Amaral, hakerek nain ne’e hakerek iha artigu rua nebe ho nia topiku ketak-ketak. artigu dahuluk ho nia titulo, "Timor Plaza" no artigu daruak ho nia titulo "Telkomcel".

Segundu Lugar: Adelson Raimundo Reis Amaral

Partisipante nebe hetan III lugar maka ho naran Maxibiano Soares Horacio, hakerek nain ne’e hakerek iha artigu rua nebe ho nia topiku ketak-ketak. artigu dahuluk ho nia titulo, "Escola São Pedro" no artigu daruak ho nia titulo "Tasi-Tolu".

Terseiru Lugar: Maxibiano Soares Horacio

Dili Wikipedia Contributor (DWC) hakarak hato’o obrigado wain ba Timor Plaza ne'ebe sai ona sponsor ba eventu refere no ba suporta tomak husi Fundasaun Dezenvolvimentu Software Livre (FDSL), Females Love Information Technology (FEELIT) no Rede Kreatividade Fotografu (REKREATIF).

Kontinua Le'e

Workshop “How To Make Money From Your Blog”

Iha loron 15-16 Agostu 2017, Fundasaun Dezenvolvimentu Software Livre (FDSL) organiza eventu ho nia tema jeral kona ba "Monetize Blog" no nia topiku kona ba "How To Make Money From Your Blog" iha Timor Plaza.

Adelino Dos Santos nudar Sekretariu iha FDSL informa katak eventu refere organiza ho objetivu atu fahe experiensia no matenek ba partisipantes liu-liu foinsa’e sira oinsa hakerek no utiliza blog bele hetan ona osan alende ne’e mos oinsa hakerek blog ne’ebe furak no diak atu le’e nain sira bele asesu hela deit. Workshop ne’e hala'o durante loron rua (2), Loron primeiru hala'o Workshop ho objetivu atu fahe kunesimentu blog liu husi teoria ne’ebe adekuadu atu nune’e partisipantes sira sei fasil atu hakat ba faze pratika no implementasaun.

Iha loron daruak partisipante sira sei praktika direita oinsa kria, dezenu no dezemvolve blog liu husi utilizasaun template, widget no modifikasaun blog tuir ida-idak nia hakarak.

Nelson Da Silva Dos Santos nudar xefe komisaun organizadora akresenta katak, "Iha loron dahuluk 15 no 16 de agostu 2017, FDSL organiza workshop no pratika ho nia topiku “How To Make Money From Your Blog” ho nia objetivu atu fo kunesimentu ba foin sa’e sira katak hare ba teknolojia ne'ebe avansadu tebes, hanesan liu husi kria blog mos bele hetan osan no oinsa maneira atu bele hetan osan refere" ne’e mak objetivu husi eventu ida ne’e.

Iha mini seminar refere iha orador I ho naran Nelson Maia Siqueira Amaral husi Futuru Informatika Timor-Leste (FITL) ne'ebe aprezenta nia materia ho titulo Tips/Trik Blog utiliza lian Tetum ne'ebe halai liu ba oinsa ita kria ita nia blog sai furak liu hodi atrai ema nia laran hodi bele vizita ita nia blog.

Orador I: Nelson Maia Siqueira Amaral

"Antes atu hatene tips/trik ba blog, ita tenki hatene blog nee nia vantazen saida no oinsa buat ne'ebe ita hakerek bele fo vantazen ba lei nain sira. Ezemplu: ita nia blog nia topiku konaba edukasaun maibe ita hakerek laos kona ba edukasaun, entaun ida nee ladiak no halo ema susar atu vizita ita nia blog" Nelson Amaral hateten.

Liu husi mini seminar ida nee mos orador Nelson Maia Siqueira Amaral hakarak hato’o nia esperansa katak "Ba futuru hakerek nain sira bele koko atu hakerek blog ho lian Tetum atu nune’e bele promove lian Tetum iha mundu teknolojia. Ezemplu : hakerek kona ba istória Timor-Leste, hakerek kona ba edukasaun, kona ba jovem sira nia istória liu-liu partisipasaun feto iha mundu teknolojia buat sira nee mos presiza hakerek atu nune’e ita nia jerasaun tuir mai bele hatene kona ba tempu pasadu antes sira iha".

Iha parte seluk orador II maun Eligio Moniz do Rego nudar Autores ativu iha blog elovia.biz no matadalanlinux.com aprezenta materia konaba Monetize Blog ne'ebe meteria refere foka liu ba definisaun, stretejia no metodu oinsa bele hetan osan utiliza blog.

Orador II: Eligio Moniz do Rego

"Esplikasaun badak deit katak Monetize Blog ne'e nudar maneira ou stratejia para bele hetan osan husi blog. Antes ha'u kontinua ba parte metodu no stratejia hetan osan husi blog, tenki hatene uluk lai katak iha tipu tolu Autores wainhira ita involve iha mundu blog. Tipu dahuluk maka blogger mak involve iha mundu blog la'os tamba hakarak hetan osan. Tipu daruak maka blogger mak involve iha mundu blog tamba hakarak hetan osan. Tipu ikus maka kombinasaun husi tipu dahuluk ho daruak." Hato'o husi Eligio Moniz.

Iha oportunidade ne'e mos maun Eligio Moniz do Rego hato'o nia esperansa ba blogger tomak katak "Labele hanoin sai blogger ho objektivu foka buka osan iha Blog deit, maibe tenki mos kontribui nudar Autores blog mak bele promove Timor-Leste atraves blog ba mundu no mos tenki produs informasaun ho lingua Tetum mak bele fo benefisiu ba Leitores tomak".

Workshop ne’e rasik hetan suporta husi Timor Plaza, Telkomcel, FDSL, XTRABOX ho LikisaHost no organiza husi Females Love Information Technology (FEELIT).

Kontinua Le'e

Female Blogger "Feto Mos Bele"

Iha mundu teknolojia figura ne'ebe mosu iha media maioria mesak mane hotu deit maske ita hatene iha mundu maioria feto kompara ho mane. Hare fila-fali ba situasaun iha Timor-Leste neneik maibe bebeik, Females Love Information Technology (FEELIT) mos hakarak hola parte iha Teknolojia Informasaun no Komunikasaun hodi sai komunidade ida atu fasilta Feto Timor-Leste oan sira atu aprende fahe, no kontribui ba Teknolojia Informasaun no Komunikasaun.

Fontes Fotografia: Marfilho F. A. Pereira

FEELIT organiza eventu Female Blogger durante loron rua, ho objektivu atu promove feto iha mundu Teknolojia liu husi hakerek iha blogger. Iha primeiru dia 11 de agostu 2017, iha mini seminar Female Blogger atu fo kunesimentu kona ba saida mak blogger no oinsa kria blogger. Iha loron Segundo 12 de agostu 2017, iha kompetisaun kona ba blogger ne'ebe ho nia titulo "Feto Mos Bele".

Fontes Fotografia: Marfilho F. A. Pereira

Iha mini seminar Female blogger iha oradora I ho naran Esteviana de Fatima ne'ebe koalia kona-ba oinsa atu hakerek iha blog no oinsa atu motiva foinsa’e sira, liu-liu feto bele kreativu liu iha teknolojia. “Iha blogspot ita bele rai dokumentu hirak ne'ebe mak bele lakon iha komputador wainhira komputador a’at, iha blogspot bele promove ita nia a’an, liu husi ita nia obra literaria nian” hato'o husi oradora Esteviana De Fatima.

Fontes Fotografia: Marfilho F. A. Pereira

Iha oradora II ho naran Maria Zevonia Fernandes Vieira ne'ebe kolia kona ba jornalismo online.

"Iha blog oinsa ita hakerek diak, labele desfama ema, foti notisia ne’ebe bazeia ba realidade ema nian. Ho servisu jornalista online nian bele fasilita le’e nain assesu ba iha informasaun refere ho lais ho razaun katak sempre up to date informasaun liu husi blog" hateten husi oradora II Maria Zevonia Fernandes Vieira. Iha loron Segundo iha 12 de agostu 2017, iha kompetisaun kona ba blogger ne'ebe ho nia titulo "Feto Mos Bele".

Fontes Fotografia: Marfilho F. A. Pereira

Iha kompetisaun Female Blogger ida ne’e ho objektivu katak atu pratika ou expresa sai theorya ne'ebe sira hetan ona liu husi mini seminar ne'ebe sira hetan iha loron ptimeiru. Liu husi kompetisaun ida ne’e  bele mos halo sira komprende liu tan no hasa’e sira nia kapasidade iha area Teknolojia Informasaun no Komunikasaun.

Fontes Fotografia: Marfilho F. A. Pereira

Iha kompetisaun Female Blogger partisipante ne'ebe sai manan nain ba terseiru lugar mak Gliseria Quintão ne'ebe nia hakerek jeralmente konaba feto mos bele iha parte oin-oin, klaru liu bele vizita nia blog ho tema Kontribuisaun Feto nian.

Fontes Fotografia: Marfilho F. A. Pereira

Iha kompetisaun Female Blogger partisipante ne'ebe sai manan nain ba segundo lugar mak Sara Maria Rinella Putri Tilman ne'ebe nia hakerek konaba papel servisu husi mana Maria M. Pade nudar Manajer Marketing iha kompania TELKOMCEL, klaru liu bele vizita nia blog ho tema Feto nia kontribuisaun ba Dezenvolvimentu.

Fontes Fotografia: Marfilho F. A. Pereira

Iha kompetisaun Female Blogger partisipante ne'ebe sai manan nain ba terseiro lugar mak Milania Isabel de Asuncao Nunes ne'ebe nia hakerek konaba diferensia feto iha tempu pasadu & tempu agora, klaru liu bele vizita nia blog ho tema Feto mos bele.

FEELIT hakarak hato’o obrigado wain ba TELKOMCEL ne'ebe hametin ona ita nia laran hodi sai nudar sponsor ba eventu "Female Blogger" no obrigado mos ba Fundasaun Dezenvolvimentu Software Livre (FDSL) ne'ebe fo ona suporta tomak ba FEELIT.

Ami mos hato'o agradese wain tebes ba maun Hipolito Baptista (Ney) ne'ebe kria ona video kona-ba atividade refere.

Kontinua Le'e

Asaun Hadomi Ambiente (AHA)

Iha loron Sabadu, 15 Jullu 2017, komunidade Females Love Information Technology (FEELIT) serbisu hamutuk ho Fundasaun Dezenvolvimento Software Livre (FDSL), Rede Kreatividade Fotografu (REKREATIF), Dili Photography Community (DPC), Movimento Tasi Mos, Rotary Dili Lafaek, no Gembel Art Collective realiza dahuluk eventu Asaun Hadomi Ambiente (AHA) iha fatin Bidau Santa-Ana.

Fontes Fotografia: Daniel Pinto

Objetivu husi AHA maka hamo'os foer sira nebe’e namkari iha tasi-ibun, prevene husi moras oin-oin nebe’e impaktu husi foer, hasa’e atensaun husi komunidade, no hametin amizade entre komunidade.

Fontes Fotografia: Delio Ramos

Espera katak ho aktividade ida ne’e sei fanun maluk sira hotu hodi tau atensaun katak soe foer arbiru mos bele hetan moras no halakon dili nia furak. Tan ne’e husi AHA, hakarak hala’o aktividade ne’e kada fulan ida.

Fontes Fotografia: Hipolito da Silva Baptista

Alende ne’e iha mos kompetisaun "Photo On The Spot" iha kompetisaun refere loke jeralmente ba maluk sira nebe’e partisipa aktividade AHA tamba fotografia nebe’e foti tenki husi aktividade refere no kada ema ida, fotografia ida.

Fontes Fotografia: Alexandrino de Carvalho | Primeiru Lugar

Iha kompetisaun "Photo On The Spot" refere manan nain nebe’e sai nudar primeiru lugar maka belun Alexandrino de Carvalho. Iha fotografia ne’e hatudu mai ita katak labele soe foer arbiru liu-liu iha area baleta no mota tamba ne’e kria moras no halakon furak husi ita nia rai doben.

Fontes Fotografia: Julio Arlindo G. Pereira | Segundu Lugar

Manan nain nebe’e sai nudar segundu lugar maka belun Julio Arlindo G. Pereira. Iha fotografia hatudu katak serbisu hamutuk mos importante liu husi aktividade ne’e bele hametin amizade entre komunidade sira hotu.

Fontes Fotografia: Noviani Hi Manafe | Terseiru Lugar

No manan nain nebe'e sai nudar terseiru lugar maka belun Noviani Hi Manafe. Fotografia ne’e hatudu mai ita katak iha aktividade refere laos partisipa deit husi mane, maibe partisipa mos husi komunidade Feto maluk mos.

Ikus mai ami hato'o obrigado wain tebes ba TELKOMCEL ne'ebe apoiu ona atividades ne'e bele la'o ho susesu.

Alende ne'e mos, ami hato'o agradesementu ho apresiasaun bo'ot tebes ba belun sira mak involve ona iha atividades Asaun Hadomi Ambiente.

Ita sei sasoru mali fali iha AHA tuir mai.

Kontinua Le'e